Shoqëria e marketingut eMarketer ka publikuar disa të dhëna shumë interesante për sa i përket përdorimit të rrjeteve sociale nga të rinjtë në Amerikë. Bie në sy sidomos rënia e numrit të përdoruesve të rrjetit social më të përdorur në botë Facebook. Sipas eMarketer rënia e numrit të përdoruesve të rinj i ka kaluar parashikimet. Në fakt për vitin 2017 eMarketer kishte parashikuar një rënie prej 3,4 % në grupmoshën 12-17 vjeç kurse rënia reale mendohet të jetë 9,9 % pra gati trefishi. Një rezultat me të vërtetë shumë negativ për kompaninë e themeluar nga Mark Zuckerberg.
34 % e të rinjve thonë se Facebook është për të moshuarit
Konkurrenca për të rinjtë është shumë e fortë në rrjet. Adoleshentët janë shumë të kërkuar nga kompanitë e internetit dhe të teknologjisë për disa arsye. Ata e përdorin teknologjinë më shumë orë në ditë, janë të interesuar më shumë për risitë në fushën e teknologjisë dhe padyshim janë edhe një investim për të ardhmen. Në këtë fushë duket se Facebook po humb shumë pikë. Facebook në fakt është në vendin e dytë për përdorim nga grupmosha 12-17 vjeç menjëherë pas YouTube. Në vendin e tretë është Instagram, por të dyja këto kompani ndjejnë nga afër konkurrencën e Snapchat e Twitter që në vitet e fundit kanë regjistruar rritje serioze.
Është interesant fakti se shumë nga adoleshentët e intervistuar mendojnë tashmë se Facebook dhe Pinterest janë për të moshuarit e ata preferojnë rrjete sociale më dinamike si Snapchat, Twitter e Instagram
Kjo nuk do të thotë se gjithçka po shkon keq. Numri i përdoruesve të Facebook vazhdon të jetë në rritje kudo në botë. Në Amerikë për shembull llogaritet se këtë vit do të ketë rreth 1 % rritje në krahasim me vitin e kaluar. Ajo që shqetëson është ulja e përdoruesve adoleshentë. Nga ana tjetër edhe polemikat e shumta mbi përdorimin e Facebook nga fëmijët nuk janë pozitive. eMarketer vë në dukje se shumë nga të rinjtë kanë humbur interesin kundrejt Facebook pasi e konsiderojnë një rrjet social për më të vjetrit. Këtë vit mendohet se Facebook do të humbë rreth 2 milionë të rinj nën moshën 24 vjeç. Shumë prej tyre do të spostohen drejt rrjeteve të tjera sociale si Instagram që do të shtojë rreth 1,6 milionë përdorues. E ndoshta ky është një lajm pozitiv për Facebook pasi edhe Instagram është pronë e Mark Zuckerberg. Por nga ana tjetër konkurrenti direkt Snapchat do e rrisë numrin e përdoruesve të rinj me rreth 1,9 milionë.
Ky artikull është pjesë e editorialëve tanë mbi biznesin. Nëse do të dish më shumë të lutem kliko këtu
