Facebook ka bërë të ditur që nuk do të lejojë që në faqet e rrjetit social të ketë reklama të kriptomonedhave pasi shpesh ato janë mashtrime. Me këtë vendim kompania godet jo vetëm monedhat virtuale si Bitcoin, Ripple, Litecoin e Ethereum, por edhe kompanitë financiare që promovojnë shërbimin e shit-blerjeve. Vendimi do të zbatohet edhe në kompanitë e tjera në pronësi të Facebook si Instragram apo Audience Network.
Facebook tutelon kështu reklamuesit
Sidoqoftë kompania lë të kuptohet që ky vendim është i përkohshëm. Në fakt Facebook ka nisur të punojë për përpilimin e një strategjie për të përmirësuar reklamat në rrjetin social. Në këtë projekt bën pjesë edhe “pastrimi” i rrjetit social nga reklamat që mund të mashtrojnë përdoruesit, por edhe që i prishin imazhin reklamuesve dhe kompanive serioze. Prej kohësh Facebook është akuzuar që nuk bën aq sa duhet për të mbrojtur përdoruesit nga shumë reklama negative apo edhe përhapja pa kufij e atyre që quhen “fake news”, pra lajmet e rreme. Me sa duket kompania ka vendosur të punojë seriozisht në këtë drejtim. Ndërkohë po punohet intesivisht për të ngritur një sistem më efikas për identifikim dhe eliminimin e reklamave të rreme dhe mashtrimeve.
Efektet mbi monedhat virtuale pritet të jenë negative
Kohët e fundit kritpomonedhat kanë pësuar luhatje dhe goditje nga drejtime të ndryshme. Vetëm para disa ditësh u regjistrua në Japoni vjedhja më e madhe në monedha virtuale e ndodhur ndonjëherë në këtë sektor. Tek serverat e Coincheck u zhdukën monedha virtuale me një vlerë prej gati gjysëm miliardi dollarë (534 milionë) nga llogaritë e rreth 260 mijë përdoruesve. Pas euforisë së fundvitit 2017 gati të gjitha monedhat virtuale kanë regjistruar rënie të dukshme nga 30 % deri edhe 60 % në një muaj. Vendimi i Facebook padyshim që nuk do e ndihmojë besimin e investitorëve të sektorit madje mund të vërë në lëvizje edhe kompani të tjera të reklamave.
Ky artikull është pjesë e editorialëve tanë mbi sigurinë në rrjet. Nëse do të dish më shumë të lutem kliko këtu
